Ang Filipino, bilang asignatura sa Ateneo de Naga ay may tungkuling matulungan ang mga mag-aaral na mahubog ang kanilang ganap na pagkatao sa aspetong moral, ispiritwal, intelektuwal at sosyal. Gabayan sila sa kanilang pagsisikap na makamit ang ibayong kahusayan bilang paghahanda sa kinabukasan. Nangangahulugan ito ng paglinang sa kakayahang pangkomunikasyon upang magamit sa pagpapahayag ng saloobin at kaisipan; pagkilala sa sarili, tungkulin sa pamilya, sa kapwa at sa bansa lalung-lalo na sa rehiyong Bikol sa tulong ng mga makabagong estratehiya sa pagtuturo gamit ang teknolohiya at multi-media; at higit sa lahat, pagsasabuhay sa mga pagpapahalagang pangkatauhang dulot ng iba't ibang  makabuluhang paksang tinalakay tinalakay at katuruan ng ebanghelyo.  

First Year

SINING NG KOMUNIKASYON SA FILIPINO I 

Ang kursong ito ay naglalayong malinang ang mga batayang kakayahang pangwika tungo sa pagtamo ng kasanayang komunikatibo. Kaugnay nito, bibigyan ng ibayong pansin ang pagpapaunlad sa apat (4) na  kasanayang makro tulad ng pagsasalita, pagsulat, pagbasa, at pakikinig. Gagamiting lunsaran ang mga piling akdang pampanitikan sa paghubog ng malikhain at mapanuring  pag-iisip na magsisilbing landas sa pagbubukas sa higit na pagkilala sa sariling kakayahan. Higit sa lahat sa pagpapahalaga sa damdaming makadiyos at makabayan. 

Layunin ng Kurso 

Pagkatapos ng takdang panahon ng kursong ito ang mga mag-aaral ay inaasahang: 

1. Napalalawak ang mga kasanayan sa pag-unawa, pagpapakahulugan, pagsusuri at pagbibigay-halaga sa mga kaisipan o paksa;
2. Natatamo ang mga kasanayan at kaalaman sa paggamit ng Filipino sa pakikipagtalastasang pasalita at pasulat na ayon sa sitwasyon, pangangailangan at pagkakataon;
3. Napagyayaman ang mga karanasan sa pamamagitan ng mga akdang panretorika upang mag-angkin ng malawak na kaisipan at pananaw sa buhay;
4. Naipakikita ang kakayahang pumili ng pamaraan at batayang panretorika upang maipahayag ang sariling kaisipan, ideya, opinyon, damdamin at mga saloobin;
5. Nalilinang ang kakayahang kumilala ng mga katangiang pampanitikan sa pamamagitan ng masusing pamamahayag at bukas na kaisipan.
6. Napahahalagahan, napangangalagaan  at nalilinang ang katangiang moral, ispiritwal at iba pang kanais-nais na pagpapahalagang pangkatauhan at mga kaisipan sa mga katutubong panitikan na matatagpuan sa kultura at lipunang Pilipino; 

Second Year

SINING NG KOMUNIKASYON SA FILIPINO II 

May dalawang uri ng balangkas ng Syllabus-Lesson Plan ang asignaturang ito. Ang para sa natatanging pangkat (honors program) at pangkalahatang pangkat(semi-honors program). Nilalayon ng kursong ito na maragdagan at malinang ang kasanayang pangkomunikasyong natutunan sa unang taon tungo sa ibayong pagpapaunlad ng mga pangwikang kasanayan sa ikalawang taon: pasalita, pagbasa, pakikinig at pagsulat. Kaugnay nito, nilalayon din ang pangkalahatang paglinang ng malikhain at kritikal na pag-iisip para sa pagbubukas sa higit na pagkilala sa sariling kakayahan sa tulong ng mga akdang pampanitikan na nagpapaibayo ng kamalayang makabayan at maka-Diyos sa kontemporaryong panahon. 

Layunin ng Kurso  

Sa pagtatapos ng kurso, ang mga mag-aaral ay: 

1. Nailalapat ang mga natamong kasanayang pangwika sa pagsulat o pasalitang pahayag;
2. Naipapakita ang pagkamasining, mapanuri at epektibong pagpapahayag;
3. Nahuhubog ang kritikal na pag-iisip sa pagtugon sa mga sitwasyon ng buhay;
4. Napapahalagahan at nalilinang ang katangiang moral, ispiritwal at iba pang kanais-nais na pagpapahalagang pangkatauhan at mga kaisipan sa mga katutubong panitikan na matatagpuan sa kultura at lipunang Pilipino;
5. Napapalawak  ang mga kasanayan sa pag-unawa, pagpapakahulugan, pagsusuri at pagbibigay-halaga sa mga kaisipan o paksang tatalakayin;
6. Naipapakita ang kakayahang pumili ng pamaraan at batayang panretorika upang maipahayag ang sariling kaisipan, ideya, opinyon, damdamin o mga saloobin;
7. Nalilinang ang kakayahang kumilala ng mga katangiang pampanitikan sa pamamagitan ng mapanuring pamamalagay at bukas na isipan;
8. Napapayaman ang karanasan sa pamamagitan ng mga akdang pampanitikan upang mapalawak ang kasanayan at pananaw sa buhay;
9. Nagagamit ang makabagong teknolohiya sa pananaliksik, at pakikipagtalastasan  para sa pakikipag-ugnayan at higit na pagkatuto.  

Third Year

SINING NG KOMUNIKASYON SA FILIPINO III 

Sa Filipino 3, may dalawang hati uri rin ang syllabus-lesson plan. Ang para sa natatanging pangkat(honors program) at pangkalahatang pangkat (semi-honors program). Dito masasanay ang bawat mag-aaral sa pangkabatiran, pagsisiyasat at pandamdaming mga gawain na magpapahalaga sa bawat mithiin at kawilihan na lalong magpapalago sa mga kaalamang natutunan mula sa Unang Taon sa Hayskul at maihanda sila sa mga aralin sa Ikaapat na taon.

Layunin ng Kurso 

Pagkatapos ng kurso,inaasahang

1. Napasisidhi ng mag-aaral ang kanyang pagpapahalaga sa Filipino
2. Napag-uugnay-ugnay ang mga pangyayari noon sa kasalukuyan at sa kanyang sarili upang lalung mapalago ang kanyang pagkatao sa tulong ng kanyang matibay na pananalig sa Diyos.
3. Nakagagamit ng wikang Filipino sa maayos na paraan sa pakikipag-ugnayan at pakikipagrelasyon sa kapwa
4. Nakapagdedesisyon nang matalino sa mga sitwasyong mararanasan na isinasaalang-alang ang kapakanan ng iba.
5. Nakapagmamasid nang masuri sa/ng mga nagaganap sa kanyang kapaligiran
6. Natatanggap ang sarili at kapwa sa pamamagitan ng pagsasaalang-alang sa pagkakaiba ng pagkatao  

Fourth Year

SINING NG KOMUNIKASYON SA FILIPINO IV 

Ang kursong ito ay nagtataglay ng dalawang uri ng  balangkas na naaayon para sa natatanging pangkat (honors program) at pangklahatang pangkat ( semi- honors program)  na magbibigay sa mga mag-aaral upang maging bihasa sa mga kasanayang makro ( pagbasa, pagsulat, pagsasalita at pakikinig) na magagamit nila tungo sa higit na mabisa o epektibong pagpapahayag sa wikang Filipino.  Nagtataglay ito ng mga aralin at pagsasanay sa wika at panitikan na magsisilbing daan sa mga mag-aaral upang malinang ang kakayahan sa mapanuri at malikhaing pag-iisip at matalinong pangangatwiran  para aktibong makibahagi sa mga gawain tungo sa produktibong pagkatuto. Bahagi pa rin ng kursong ito ang higit na malinang ang mga kasanayan sa pag-unawa, pagpapakahulugan, pagsusuri at pagbibigay halaga sa paglinang  sa mga kaisipan sa  paksang binabasa at tinatalakay. Binibigyang- diin  sa pag-aaral na ito ang pagkilala at pananalig sa Poong Maykapal. Ihihahanda ang mga mag-aaral para sa pagpasok nila sa susunod na antas ng pag-aaral. 

Layunin ng Kurso

Wika 

1. Naisasagawa nang higit na mabisa  ang apat na paraan ng pagpapahayag ( paglalahad, pagsasalaysay, paglalarawan at pagsagot)
2. Nalilinang ang kakayahan sa wasto at mabisang pakikinig, pagbasa atbp. Sa pamamagitan ng dinamiko at aktibong pakikipagtalastasan. 
3. Naipakikita ang pagiging masining, makulay at malikhain sa pagpapahayag at pagpapakahulugan ng mga kaisipan.
4. Napaunlad ang kasanayang mag-isip, sumuri at mangatwiran nang may kahusayan sa pamamagitan ng mga kaisipan.
5. Napahahalagahan ang Wikang Filipino bilang kasangkapan sa mabisang pakikipagtalastasan. 

Panitikan 

• Nalilinang ang kaalaman, kasanayan at pagpapahalaga sa Panitikang Filipino lalung-lalo na sa Panitikang Bikol.
• Napahahalagahan, napangangalagaan at nalilinang ang katangiang moral, ispiritwal at iba pang kanais-nais na pagpapahalaga (values) at mga kaisipan na matatagpuan sa ating kultura at lipunang Pilipino.
• Napayayaman ang karanasan sa pamamagitan ng pagbasa ng mga akdang pampanitikan upang mag-angkin ng malawak na kaisipan at pananaw sa buhay.
• Nakalilikha at nakasusuri ng iba’t ibang genre ng panitikan.