Pormal namang nagbukas ang aktibiti ng nagbigay ng talumpating pambungad si Ginoong Claro A. Chavez, pinuno ng Kagawaran ng Filipino ng Ateneo Hayskul. Sa kanyang talumpati sa komunidad ng Ateneo, pinukaw niya ang pagpapahalaga sa Wikang Filipino at sa pagtataguyod nito na sinimulan ng dating Pangulong Manuel Quezon. Ayon kay G. Chavez, "ang wika ay di lamang hanguan ng pagkakakilanlan subalit larawan din ng pagkakaisa."  

 

Napuno ang palatuntunan ng mga pagtatanghal mula sa mga mag-aaral at guro ng paaralan: kabilang na ang pag-awit nina Ginoong Mark Avila, duet nina Bb. Sharon Lara at Alyssa Sayson at ang pagsayaw sa mga maindayog na makabagong tugtugin sa wikang Filipino ng piling mag-aaral ng ikaapat na taon.  

 

Ginawad rin ang mga gantimpala sa iba't ibang patimpalak na idinaos sa buwan ng Agosto, tulad ng pagsulat ng sanaysay at paggawa ng tula. Ang pagdiwang ng Buwan Ng Wika tuwing buwan ng Agosto ay isang tradisyon hindi lamang sa Ateneo de Naga kundi sa buong Pilipinas. Nakagawian na rin ng Kagawaran ng Filipino na mamuno sa pagtatanghal upang mabigyang halaga ang wikang pambansa.